一直強調自己無「夫妻宮」，唔會考慮結婚的郭富城，最近忽然改口，表示希望在五十歲前結婚生仔；現年四十六歲，距離「有效日期」唔夠四年。

據知，與城城拍拖超過五年的熊黛林，收到「阿王御准」生仔令後，早前曾秘密到聖保祿醫院做婦科檢查，為生仔作好準備，點知發現子宮生了纖維瘤；為免影響佗B大計，城嫂當機立斷，做微創手術將纖維瘤清走。

做完手術調理好身體，加上城城剛剛完成十七場演唱會，熊黛林頻頻上「城府」過夜不設防密密做，盡力搶生。

郭富城與熊黛林拍拖超過五年，是城城史上維持時間最持久的女友，經過長時間考驗同觀察，城城已視熊黛林為對象，近期更一改口風，表示想在五十歲前結婚生仔，更公開講話唔介意先生仔後結婚，「我唔係思想守舊派，最緊要係有冇能力，如果上天賜俾我，到時我會再處理！」

「其實以前Aaron（郭富城）真係冇諗過要結婚生仔，覺得有老婆有細路會綁手綁腳，冇晒自由去做自己鍾意做嘅嘢，但係見到班friend好似Chilam（張智霖）同沈嘉偉咁，全部都有晒自己家庭，個個都同佢講生仔有幾好，又鍾意小朋友多過玩車；有時出席啲聚會，其他人一家大細咁，佢自己就仲係一支公，睇吓諗吓，半年前佢開始同阿Lynn商量生仔嘅問題。」城城好友說。

手術後經過多月調理，加上城城早前要為十七場紅館個唱保持體力及狀態而謝絕女友上「城府」過夜，小別勝新婚！城城完騷（一月三日）當晚，熊黛林與父母及哥哥捧完尾場，即飛返屋企帶埋男友所送的愛犬Cookie，揸車到城城位於大坑道寓所，靜候城城在酒店同工作人員做埋慶功，再返屋企同她解禁慶祝。當晚熊黛林在「城府」留到第二日傍晚，才返回自己寓所，接專程由南京來港陪她的家人出外食飯。

雙方關係已經去到要熊黛林生仔的地步，今次熊黛林父母同胞兄來港，城城除了安排女友一家睇演唱會，更相約未來外父外母食飯，進一步確定熊黛林地位。

「Aaron拍咁多次拖，都未聽過佢會去見家長，睇嚟佢對阿Lynn都好認真，如果唔係點會同佢哋食飯呀！」城城好友說。

據知熊黛林已向經理人表明立場，如果有任何合約訂明在合約期內不可懷孕，她一律企硬唔簽，寧願搵少啲都要幫男友生仔，可見城嫂有幾心急。